ROXAS CITY – Nagpabalhag sa Roxas City Police Station ang magtimbang nga bahin nga imbolbado sa nagluntad nga kinagamo sa Barangay Lawaan, Roxas City.
Suno sa ginpabalhag nga reklamo ni Hermogenes Barona 36-anyos sang nasambit nga lugar nga samtang nagainom ini sa ila balay hinali na lamang nga nag-abot ang ginareklamo sini nga si Mark Antony Ariel alyas Libat kag nag rebolusyon sang iya motorsiklo.
Gilayon man nga nagpadalagan sang madasig si alyas Libat apang makaligad ang pila ka minutos nagbalik naman ini sa lugar ni Barona sa diin ginapangita sini ang yabi sang iya motorsiklo.
Bangud diri, ginkompronta ini sang kaupod ni Barona nga si Jessie Togonon rason nga naakig ini sa ila.
Ginaalegar nga gintiklod ni alyas Libat sanday Barona kag Togonon kag gilayon man nga naglakat.
Apang sa pagbalik na sini sa lugar kaupod na ni alyas Libat sanday Bedong Anisco, Odeth Ariel, Terry Ariel, Lyza Ariel, Dave Anisco, kag Rodrigo Dasas sa diin ginaalegar may yara sila sang dala nga hinganiban sa diin ginapahog kag ginahaboy na sang botelya ang balay ni Barona.
Bangud diri, gin-atake sa korason ang iloy ni Barona nga si Membeluz Barona 69-anyos kag gilayon nga gindala sa ospital.
Suno naman sa alegasyon ni alyas Libat nga naglabay lamang ini sa lugar nanday Barona kag nahulog ang yabi sang iya motorsiklo rason nga ginpangita niya ini.
Apang, ginaalegar nga samtang nagaistorya ini kay alyas Ricky hinali na lamang ini ginlamposan sang botelya kag may nagtirador sang balb wire sa iya nawala nga dughan.
Aminado man si alyas Libat nga gin-ransak nila ang balay nanday Barona kag yara sila sa idalom sang impluwensya sang makahulubog nga ilimnon.
