ROXAS CITY-Ginkompirmar sang hepe sang Mambusao Municipal Police Station nga may yara sang kinawatay nga natabo sa mga stall sa sulod sang Mambusao Public Market sa Barangay Poblacion Tabuc, sa nasambit nga banwa.
Ini ang ginkompirmar ni Police Captain Edwin Luces, ang hepe sang Mambusao Municipal Police Stations sang mainterview sang Bombo Radyo Roxas.
Ginpahayag ni Luces nga nagpadulong sa talatapan sang polisiya ang mga stall owners nga sanday Boyet Ocate, Alfredo Silvestre, Rolando Lunas, kag Vilma Lantoria matapos nga nadiskubrehan nga ginsulod sang mga kawatan ang ila nga mga stall sa nasambit nga merkado.
Suno kay Luces nga base sa nakuha nga mga laragway sa CCTV footages nagaguwa nga duha ka mga menor de edad nga lalaki ang responsable sa amo nga insidente.
Natigayon nga nataban sang duha ka mga menor de edad ang cellphones, frozen goods, kag iban pa mga mga produkto.
Dugang pa sang opisyal nga gilayon nga nag conduct sang hot pursuit operation ang mga kapulisan kun sa diin narekober diri ang pila ka mga ginkawat nga mga items sang duha ka mga menor de edad apang nagapabilin sa guihapon nga at-large ang mga suspetsado.
Sa karon indi mapat-ud sang mga kapulisan ang kabug-osan nga bili nga nataban sang duha ka mga menor de edad.
Samtang sa pagpangusisa sang Bombo Radyo Roxas, may yara man sang nagabantay nga mga security guard apang wala nila natalupangdan ang pagsulod sang mga suspetsado.
