ROXAS CITY – Mahina kung ikumparar sadtong tinalikdan nga tuig, ang kita sang mga pangayaw nga sidewalk vendors nga nagpadulong sa probinsya agud saksihan ang Sinadya Festival 2024.
Sa interview sang Bombo Radyo kay Mansawi Mangontawar, 31-anyos nga nagikan sa Barbaza Iloilo City, ginpahayag sini nga naganyat lamang sila bangud sadtong tinalikdan nga tuig dako ang kita sang mga manugbaligya apang subong dako ang deperensya.
Suno kay Mangontawar, indi niya matuad nga perdi ang ila kita kada adlaw bangud indi man madulaan sang bumalakal.
Mahibaluan nga yara sa P300.00 ang ila renta kada adlaw sa ila pwesto.
Dugang pa sini nga nagasugod sila nga magpadulong sa probinsya sadtong Disyembre 1 kag magadugay tubtob Enero 5 sa masunod nga tuig.
Sa separado naman nga pagpakig-angut kay alyas Nora, tumandok sang Roxas City, ginpahayag sini nga kung sadtong tinalikdan nga tuig nagakita sila sang 100% apang subong yara lamang sa halos 75%.
Suno sa iya ini bangud nakaseparar ang mga aktibidad kag programa sang probinsya indi kaangay suno diri sadto nga nakasentro lamang diri sa Plaza.
Mahibaluan nga linibo nga mga tawo nagikan sa nagkalain-lain nga kaprobinsyahanan ang nagpadulong sa probinsya agud magtambong kag magkinasadya sa Sinadya Festival 2024.
