ROXAS CITY – Tuman nga naapektuhan ang kita sang Roxas City Integrated Transport Terminal sang ginapangatubang sa karon nga pandemiya tuga sang coronavirus disease.
Ini ang ginpahayag mismo ni Terminal Administrator Victor Arcenas sang mainterview sang Bombo Radyo.
Matandaan nga napauntat ang operasyon sang amo nga terminal sang una nga ginpaidalom ang probinsiya sang Enhanced Community Quarantine (ECQ) sadtong Marso 15, 2020.
Suno kay Arcenas, masobra 50 porsiyento ang nadula nila nga kita bangud indi na halos malab-ot ang katunga sang sadto anay ginakita nila nga P30, 000 kada adlaw.
Base sa Summary of Earnings sa amo nga terminal humalin Marso tubtob Hunyo, ang bulan sang Marso ang may pinakadako nga kita bangud Hulyo 15 pa ginpaidalom sa ECQ ang probinsiya.
Sa bulan sa Abril wala sang kita bangud nagapabilin pa sadto sa ECQ ang probinsiya.
Sa bulan sang Mayo nakatipon lamang sang kita nga 1,000 tubtob 4,000 kada adlaw kag sa bulan sang Hunyo naga-kita ang terminal sang 9,000 tubtob 20,000 pesos kada adlaw.
Wala man suno diri sang ginasukot sa mga stall rentals sa amo nga terminal.
Isa man sa ginalantaw rason sang pagnubo sang kita sa terminal amo ang pagkaatrasar sang pagbukas sang klase bangud wala sang mga estudyante nga nagabiyahe.
Ginkalipay man ni Arcenas nga humalin sang pagpaidalom na sa Modified General Community Quarantine (MGCQ), amat-amat man nga nagabalik ang operasyon sang terminal apang limitado lamang ini sa 30 tubtob 40 porsyento.
