ROXAS CITY -Dako ang epekto sang COVID-19 sa nangin kita sang Teodoro Arcenas Trade Center ukon TATC sa siyudad sang Roxas.
Sa pagpangusisa sang Bombo Radyo Roxas, nagnubo sang kapin P1 milyon ang nangin kita sang nasambit nga merkado kadungan sang pagpaidalum sa probinsiya sa Enhanced Community Quarantine (ECQ).
Sandig sa datos, ang kita sang TATC sadtong bulan sang Enero kag Pebrero ang naglab-ut sa P2.4 milyones apang pag-abot sa bulan sang Abril, naglab-ut na lamang sa P1.5 milyones ang nangin kita sang nasambit nga merkado.
Ang pagsarado sang mga puwesto sang mga negosyante, pagpatuman sang hugot nga seguridad sa mga negosyante kag bumalakal sadtong ECQ ang ginalantaw nga mga rason sa pagnubo sang kita sang nasambit nga merkado.
Apang ginkalipay naman sang pamunuan sang TATC nga nagbalik na sa normal ang kita sang nasambit nga merkado sadtong bulan sang Mayo kag Hunyo sang ginpaidalum na sa GCQ kag MGCQ ang probinsiya.
