ROXAS CITY – Suspendido sa karon ang klase sa isa ka eskwelahan matapos ang nagluntad nga rockslide sa Barangay Barra, Roxas City.
Ginkatingala sang mga ginikanan sang mga estudyante sang Barra Elementary School ang nakapaskil nga mensahe sa guwa sang gate sang eskwelahan nga ‘’Wala sang klase subong nga adlaw bangud delikado’’.
Bangud diri, ginpadulungan sang Bombo News Team ang nasambit nga eskwelahan agud mahibaluan ang rason sang suspension sang klase.
Nahibaluan nga may nahulog nga daku nga bato gikan sa naghumok nga duta nga posible tuga sang mamunog nga pag-ulan kahapon.
Suno sa isa ka trabahador nga si Jolito Alama masaku sila sa ila trabaho sang makabati sang mabaskog nga tunog.
Bangud sa insedente nagdesisyon na lamang sila nga mag-untat sa ila nga pagtrabaho
Samtang ginsuguran na nga tiltigon ang nabilin nga mga bato agud indi na ini magtuga sang peligro sa mga estudyante nga ginahimo playground ang stage sang nasambit nga eskwelahan.
