ROXAS CITY– Temporaryo nga suspendido ang klase sa tanan nga lebel sang pampubliko kag pribado nga eskwelahan sa Roxas City bangud sa wala untat nga pag-ulan nga dala ni Bagyo nga Basyang.
Ini matapos ang deklarasyon ni Roxas City Mayor Angel Alan Celino kasunod nga ginpaidalom ang Capiz sa Tropical Cyclone Warning Signal number 1.
Magluwas sa Roxas City, suspendido naman ang klase sa tanan nga lebel sa banwa sang Dumalag kag Cuartero bangud sa padayon nga pagtaas sang lebel sang tubig sa nasambit nga mga lugar.
Samtang, gin-alerto na sang Provincial Disaster Risk Reduction and Management Office (PDRRMO)- Capiz ang mga residente ilabi na ang mga naga-istar sa mga manubo nga lugar.
Sa interview kay PDRRMO- Capiz action officer Esperidion Pelaez, ginpahayag sini nga padayon ang ila monitoring sa mga kabanwahanan agud madasig nga maabisuhan ang mga residente.
Kaangot sini, ginpasiguro ni Pelaez nga nakahanda na ang responding units sang probinsiya kalakip na ang mga gikan sa mga kabanwahanan agud magresponde kun kinahanglanon.
