Napierde nga utod pagakasuhan sang disqualification case ang nagdaug nga magulang nga barangay kapitan
ROXAS CITY – Pasakaan sang disqualification case sang napierde nga utod nga si Benjamin ”Benjie” Arcenas ang nagdaug nga utod nga si punong barangay Demetrio Arcenas Sr., sang Barangay Manapao, sa banwa sang Pontevedra, Capiz sa nagtapos nga Barangay at SK election.
Gin-ako ni Benjie Arcenas sa Bombo Radyo Roxas nga ginasikaso na sini ang kinahanglanon nga papeles agud mapamatud-an ang mga paglapas sa laye nga nakomiter sang magulang.
Kalakip sa mga alegasyon ni Benjie ang indi pagiging rehistrado nga botante sang Barangay Manapao, Pontevedra ni barangay captain elect Demetrio Arcenas Sr., wala pag-estar sa nasambit nga lugar kag wala pagboto sa adlaw sang pinili-ay.
Nakig-estorya naman si Benjie sa provincial election supervisor kag natigayon sini nga mapalab-ot ang iya natukiban nga paglapas sang magulang.
Samtang gin-ako ni Benjie nga nadismaya ini sa manubo nga turnout sang mga nagboto kag ginabasol ang utod bangud sa pagpahadluk sini sa mga tawo.
