ROXAS CITY – Naglab-ot na sa 45 nga mga kolurom nga trisikol ang nagkaladakpan matapos padayon nga nagabyahe apisar nga wala sang prangkisa.
Sa interview sang Bombo Radyo sa pinuno sang Traffic Management Unit (TMU) nga si Gonzalo “Butchoy” Andrada, ginpahayag sini nga ang nasambit nga numero base sa ila datos sumugod Setyembre 1 tubtob 24, 2024.
Suno kay Andrada, apisar nga padayon ang ila operasyon adlaw-adlaw wala sa gihapon naganubo ang mga illegal nga nagapamasahero.
Isa sa ila ginalantaw nga rason amu ang mga pasahero nga padayon nga nagasakay sa mga trisikol nga wala sang prangkisa kung sa diin ini ang nagatulod sa mga kolurom nga magpadayon sa pagbyahe.
Bangud sini, nagapangabay ang TMU head sa tanan nga mga pasahero, opisyales kag miyembro sang mga TODA nga buligan sila agud matapna na ini kag malikawan ang mga reklamo may kaangtanan sa indi instakto nga pagsuluktan.
Samtang, nagpalab-ot naman ini sang pagpasalamat kay Roxas City Mayor Ronnie Dadivas sa ginhatag nga bag-o nga service pick up agud kargahan sang mga motorsiklo kag trisikol nga ila madakpan.
Pinaagi sini, mapasanyog pa ang ila operasyon batuk sa mga illegal nga nagapamasahero.
