Bukas na sa publiko ang funeral viewing sang komedyante nga si Gil Aducal Morales ukon mas kilala sa pangalan nga si Ate Gay, antes ang iya natalana nga lubong sa Nobyembre 10.
Nagpangayo sang pasaylo ang pamilya sa ulihi nga pagpahibalo bangud masako sila sa pag-asikaso sang nabilin nga balayran sa ospital kag preparasyon para sa iya lubong.
Dugang pa nga ginpaathag sang pamilya, luyag kuntani nila nga hiwaton ang memorial ni Ate Gay sa ila komunidad kun sa diin madamo ang nakakilala kag nagapalangga sa iya, apang indi ini posible bangud sa ila subong nga financial situation.
Ginpasalamatan man sang pamilya ang mga tawo nga naghatag sang bulig, subong man ang tagdumalahan sang memorial park nga naghatag sang bulig sa pagpatigayon sang funeral service.
Matandaan nga nagtaliwan si Ate Gay sadtong Nobyembre 1 sa edad nga 55 matapos ang masobra isa ka tuig nga pagpakigbato sa isa ka talagsahon nga sahi sang kanser, ang mucoepidermoid squamous cell carcinoma.
Pila ka semana antes siya nagtaliwan, naghiwat man siya sang isa ka living funeral upod sa iya pamilya kag mga abyan.
