ROXAS CITY – Dismayado ang konduktor sang isa ka bus matapos ginaalegar ginkawatan sang P7,000 sa bulsa sang duha ka mga naka-table nga GRO.
Personal nga nagdangup sa istasyon sang pulisya si Alyas Erlo kag ginreklamo ang duha ka mga GRO nga naka-table sang nag-inum sa isa ka KTV bar sa Legaspi St., Barangay 3, sining syudad.
Ba-se sa panaysayon sang tagreklamo nagpadulong sila sang mga kaupod nga konduktor sa isa ka KTV bar, apang nag-una pauli ang duha bangud temprano pa pagkaaga ang ila nga biyahe.
Nagtable sang duha ka mga babaye si alyas Erlo kag nagpadayon sila sa pag-inum, apang sang ulihi nagdesisyon nga magpadulong sa 24/7 convenient store kaupod ang mga GRO kag isa ka agi.
Suno sa tagreklamo nga siya pa ang nagbayad sang P2,000 nga balor sang groceries sang mga GRO, matapos nga naghinyo ang mga ini.
Naglain lamang ang buot sang kundoktor bangud sa pihak sang kaayo nga ginpakita sini sa nasambit nga mga GRO, natubsan pa ini nga kawatan sang P7,000 nga koleksyon sini nga wala pa ma-remit sa ginatrabahuan nga bus company.
