ROXAS CITY – Indi kumbinsido si Capiz 1st District Congressman Emmanuel Billones Sr., sa nangin kaundan sang State of the Nation Address (SONA) ni President Rodrigo Duterte.
Ginpahayag ni Billones sa interview nga Bombo Radyo nga kulang ang kaundan sang SONA sang presidente bangud nasentro ini sa kampanya batuk sa iligal nga droga, kampanya kontra sa korupsyon kag death penalty.
Suno sa kongresista nalimtan nga mahatagan sang President Duterte ang pila ka importante nga isyu kasubong sang barangay election, pagpasanyog sang ekonomiya kag ang federalismo.
Samantala, para naman kay Capiz Governor Antonio del Rosario nga wala sang hinambalan ang presidente.
Ginpahayag ni del Rosario nga wala nalimtan sang mga Capizeño ang ginbuy-an nga pahayag ni Duterte nga magapanaug ini sa pwesto, kun sa sulod sang anum ka bulan sang iya nga pagdumala sa pungsod, indi sini mapauntat ang malapnagon nga iligal nga droga.
Wala man napunggan sang gobernador nga magpakita sang pagkabalaka sa masami pagpamuyayaw sang presidente sa tagsa ka magpatigayon ini sang speech.
Suno kay del Rosario nga indi ini maayo nga ehemplo sa mga kabataan nga mataas ang pagrespeto sa iya.
