Pabor si Anak Bayan sa direktiba sang Supreme Court sa Kongreso nga ipatuman ang Anti-Political Dynasty Law, sandig sa mandato sang 1987 Constitution.
Sa interview sang Bombo Radyo Roxas kay Matt Gonzaga, National Vice President for Visayas sang Anak Bayan, iya ginpahayag nga tion na nga may yara sang kasuguan nga magadumili ukon maga-regulate sang mga political dynasties, 39 ka tuig matapos ginsulat ang 1987 Constitution.
Suno kay Gonzaga, sa malawig nga panahon ang pila ka mga pamilya ang nagapangibabaw sa pulitika, nga suno sa iya nakaapekto sa publiko, gani dapat likawan ang ano man nga delay sa pagpasar sang kasubong nga kasuguan.
Samtang, ang nasambit nga proposal ang napasar na sa third kag final reading sa Kamara samtang yara na ini sa second reading sa Senado nga padayon nga gina-istoryahan ang palaabuton nga definition kag sakop sang political dynasty.
Nagalaum si Anak Bayan nga magahulag gilayon ang Kongreso agud mapadasig ang proseso kag matuman ang tinutuyo sang Konstitusyon angot sa mga dinastiya sa pulitika.
