ROXAS CITY – Indi mag-untat si City Councilor Moreno ‘Moring’ Gonzaga tobtob nga indi masolusyonan sang natungdan nga ahensiya sang gobyerno ang pagpasarado sang mga balay-kalingawan kag KTV-bars nga ilegal nga naga-operate kag nagabugaw sa mga menor de edad nga mga babaye.
Suno kay Gonzaga nga luyag sini nga kompleto ang natungdan nga mga ahensya nga magatambong sa committee hearing agud gilayon madesisyunan ang pagpatigayon sang inspeksyon sa mga establishmento.
Ginpahayag ni Gonzaga nga dapat magpatigayon sang inspeksyon agud indi maglapta ang mga commercial sex workers kag mapatawag man ang mga tag-iya sang mga balay-kalingawan nga wala sang permit apang padayon ang ila operasyon.
Kinahanglan suno sa iya nga i-activate ang task force nga magalibot sa siyudad kun gab-i kag nagapangsita sang mga kababainhan nga nagalagaw sa dalanon sa kagab-ihon.
