ROXAS CITY – Luyag ni City Councilor Moreno Gonzaga nga magpatawag sang committee hearing agud masulosyunan ang problema sa pagduging sang mga commercial sex workers sa syudad sang Roxas kag ilegal nga operasyon sang pila ka mga balay-kalingawan ukon KTV bars.
Suno kay Gonzaga nga paga-imbitahon sa patigayunon nga committee hearing ang mga katapo sang Bureau of Fire Protection, Roxas City Police Station, City Health Office, City Social Welfare and Development Office kag City Licensing Division.
Ginpahayag ni Gonzaga nga magapatigayon sila sang inspeksyon agud tapnaon ang nagalapta nga mga commercial sex workers nga mga kababainhan kag mapatawag man ang mga tag-iya sang mga balay-kalingawan nga wala sang permit nga nagapadayon sa pag-operate kun gab-i.
Kinahanglan suno sa iya nga i-activate ang task force nga nagalibot sa siyudad kun gab-i kag nagasita sa mga kababinhan nga nagalagaw sa dalanon sa tion sang kagab-ihon.
Dapat man suno sa iya nga i-call ang attention sang tagdumalahan sang balay-ilimnan nga nagapainom sang mga estudyante kag menor-de-edad ilabi na kun adlaw.
Nagapasalamat naman si Gonzaga sa positibo nga feedback sang mga department heads nga magaupod sa pagpatigayon sang inspeksyon sa mga balay-kalingawan.
Matandaan nga talalupangdon ang pagsaka sang numero sang kaso sang balatian nga HIV sa syudad sang Roxas.
