ROXAS CITY – May tagsa-tagsa nga prediksiyon ang pila ka mga estudyante angut sa nagahilapit nga sambuwa ni 8-division world champion Manny Pacquiao batuk kay US fighter Adrien Broner.
Ini ang ginpahayag ni Bombo International Correspondent Reynand Dumala-on, tumandok sang Capiz nga nagatrabaho bilang isa ka manunudlo sa Scotts Branch High School.
Suno kay Dumala-on, mangin ang iya mga estudyante ang bilib kay Pacquiao kag ginatangla nila ang fighting senator bangud sa mga mabug-at nga mga boksidor nga iya napierdi.
Ginpahayag pa sini nga mangin ang iya nga mga foreign students ang kilala man ang Pinoy champ kag nagalaum nga mapatumba sini si Broner.
May pipila man ini ka mga estudyante nga magapadulong pa sa Las Vegas para lamang maglantaw sang Pacquiao-Broner fight.
Mahibaluan nga Enero 20, oras sa Pilipinas, natalana nga depensahan ni Pacquiao ang iya nga World Boxing Association welterweight belt batuk kay Broner sa MGM Grand Garden Arena sa Las Vegas, Nevada.
