ROXAS CITY-Indi pabor ang bilog nga konseho sang Barangay Tiza, sining syudad nga himuon nga quarantine area ang Capiz National High School para sa mga magapauli nga mga seafarers nga na-stranded sa Cebu City kag Metro Manila
Ini ang ginpanindugan ni Punong Barangay Alfredo Albaladejo sang mainterview sang Bombo Radyo
Suno kay Albaladejo indi magpasugot ang bilog nga konseho sang barangay nga himuon ang nasambit nga buluthuan nga isolation area sang nasambit nga mga seafarers bangud madamo diri sang nagapalibot nga establisyemento.
Gindugang pa ni Albaladejo nga ginaproteksyunan sini ang mga pumuluyo sang barangay batuk sa coronavirus disease (COVID-19) rason nga hugot ang ila pagmatuk sa sini nga plano.
Samtang mas maayo suno diri nga isaylo ang quarantine area sa Gerry Roxas Foundation ukon GRF sa Barangay Dayao, sining syudad bangud wala diri sang madamo nga tawo kag malapad ang lugar.
Ginsuhestiyon man ni Albaladejo nga sa mga kabanwahanan na lamang ibutang ang mga seafarers nga magapauli sa probinsiya.
