ROXAS CITY – Konsensya ang nagtulod sa 44-anyos nga suspek agud mag-ako sa iya iloy nga siya ang nagpatay sa kaugalingon sini nga amay kag kun sa diin niya ini gintago matapos nga nangin ‘missing’ sang pila ka adlaw.
Base sa nakuha nga impormasyon sang Bombo Radyo, anom na ka adlaw nga ginapangita ang biktima nga si Rizaldo Azuro, 67 anyos sang Sitio Puntod, Barangay Dinginan, Roxas City.
Nahibaluan sa suspek nga anak nga si Roger Azuro, naluoy siya sa iya iloy nga halos indi mahim-os sa pagpangita sa iya amay rason nga gin-ako sini nga ginpatay niya ang biktima kag ginsulod sa poso-negro.
Ginpahayag sang iloy nga sa tagsa ka makainom sang makahulubog nga ilimnon ang iya nga bana, masami ini nga nagamaoy kag ginasakit ang anak nga nag-resulta sang pag-angkon sang problema sa paminsaron sang suspek.
Ginapahayag pa nga may yara sang hiligut-anon ang mag-amay bangud nakaangkon sang pilas sa kamot si Roger tuga sang tuyo nga pagpanglabo sang iya amay.
Posible nga ginlabo sa liog ang biktima matapos nga nakitaan ini sang pilas diri.
Sa karon nakahunong na sa karsel sang Roxas City Police Station ang suspek kag padalman pa sang mga kapulisan ang ila imbestigasyon bangud sa nagabaylo-baylo nga mga pahayag ni Roger.
