ROXAS CITY –Kumpirmado ang reklamo sang mga residente sang Sitio Bajay, Barangay Agtatacay Sur, Sapian, Capiz angut sa gina-construct nga dike kag pagpatambak sang duta para sa mudcrab project ni Mr. Hilario Panuncio sa Bajay river.
Ginpahayag ni Manong Lito, isa sa mga nagpirma sang petition letter nga nakalab-ot na sa Sangguniang Bayan sang Sapian, katuyuan sang ila petisyon nga mapauntat ang pagpatambak sang duta bangud apektado ang ila nga palangabuy-anan.
Suno sa tagreklamo nga sila nga tatlo ka mag-utod nga nagtanum sang mga mangrove ukon bakhaw nga karon nagkalasamad na bangud sa ginhimo nga pagpatambak sang duta ni Panuncio para sa iya plano nga mudcrab project.
Kun ini ang magpadayon, madulaan na sila sang palangabuy-anan kag wala na sang mapakaon sa ila pamilya bangud nasandig ang ila nga palangabuy-anan sa pagpamintol kag pagpanguha sang bagungon, tuway kag iban nga pakinhason.
Nahibaluan nga indi lamang ang masobra sa 50 ka mga residente sa amo nga lugar ang nagpirma sa petition letter kag nagapamatuk sa mudcrab project ni Panuncio kundi kalakip ang fisherfolk association.
Naga-apelar man sila sa sulat nga pauntaton sang Sangguniang Bayan ang para sa ila illegal dike nga ginahimo ni Panuncio bangud madamo ang magutuman.
Samtang suno naman sa isa ka barangay kagawad nga nakatigayon na nga makabisita ang Community Envrironment and Natural Resources Offices (CENRO) kalakip ang Provincial Environment and Natural Resources Office (PENRO) sa diin ila man nakita ang nangin kahalitan nga natuga sang proyekto ni Panuncio nga anay barangay kagawad kag karon isa na ka empleyado sang munisipyo sang Sapian.
