Natapos na ang konstruksyon sang bag-o nga Multi-Purpose Covered Gym sa Brgy. Intungcan, banwa sang Pontevedra, nga handa na subong nga magserbisyo bilang sentro sang nagkalain-lain nga mga programa kag aktibidad sang komunidad.
Ang proyekto kabahin sang mga prayoridad nga imprastraktura sang Gobyerno Probinsyal sang Capiz sa idalom sang administrasyon ni Governor Fredenil H. Castro, nga nagatinguha nga mapalapnag ang mga pasilidad nga makahatag sang mas maayo nga serbisyo sa mga pumuluyo.
Ginpahayag nga ang covered gym magaserbi nga lugar para sa mga pagtililipon, programa sang barangay, pasundayag, livelihood training, medical missions, kag mga aktibidad sa sports kag kabataan.
Dugang pa, mahimo man ini nga gamiton bilang evacuation center sa tion sang kalamidad kag iban pa nga emerhensya.
Ginpatuman ang proyekto pinaagi sa 20% Development Fund sang Probinsya, nga ginatuyo para sa pagpatukod sang de-kalidad nga imprastraktura kag pagpatuman sang mga prayoridad nga proyekto nga makapauswag sang kahimtangan kag kalidad sang kabuhi sang mga komunidad sa Capiz.
Ginalauman nga paagi sa bag-o nga pasilidad, mas mapabakod ang pagbinuligay, partisipasyon, kag paghiliusa sang mga pumuluyo sang Brgy. Intungcan pinaagi sa nagkalain-lain nga programa kag inisyatibo nga pagahiwaton sa lugar.
