ROXAS CITY – Pormal na nga ginpasakaan sang kaso ang serial rapist nga bading nga nagmolestiya kag nagpatay sa 14-anyos nga solterito sa Barangay Tingui-an, Balasan, Iloilo.
Sa interview sang Bombo Radyo Roxas kay P/Insp. Jona Galicia, hepe sang Estancia PNP, ginkumpirma sini nga kaso nga paglapas sa RA 9165 kon Comprehensive Dangerous Drugs Act of 2002 kag RA 10591 ukon Comprehensive Law on Firearms and Ammunition ang ginpasaka batuk kay Raden Gonzales alyas Smile sa Iloilo Provincial Prosecutor’s Office.
Gin-athag pa ni Galicia nga ang duha ka mga kaso nga ginpasaka kay alyas Smile, nag-ugat matapos nakuha sa posesyon sini ang tatlo ka sachet sang shabu kag .38 caliber revolver sang maaresto sa Barangay Lumbia, Estancia, Iloilo.
Ginkumpirma man sang opisyal nga positibo sa shabu ang unod sang tatlo ka sachet matapos ginpaidalum sa examinasyon.
Samtang, ginalauman nga ipasaka bwas nga adlaw ang kaso nga rape with homicide batuk kay alyas Smile nga responsable sa pagpatay kay alyas Toto.
