Apisar sang madamo nga panawagan sa pagbasura sang plano sa Pax Silica Industrial Hub, nagpahayag si President Ferdinand Marcos Jr. nga mangin sentro ini sang artificial intelligence ukon AI agud makahatag sang
dekalidad nga trabaho, mapabakod ang industriya, kag mapauswag ang ekonomiya sang Pilipinas.
Kabahin ini sang kaundan sang State of the Nation Address (SONA) kahapon nga adlaw.
Suno sa Presidente, kabahin ang proyekto sang 23-member US-led Pax Silica Initiative kag mangin importante nga bahin sang Luzon Economic Corridor bilang advanced manufacturing kag logistics center sa global AI kag technology value chain.
Talalupangdon nga wala sang may nagpalakpak ukon nag-react sang ginhambal ini ni Marcos.
Nahibaluan nga may pila ka sektor nga nagpabutyag sang kabalaka bangud sang posible nga epekto sang proyekto sa palibot, lakip ang daku nga konsumo sang tubig kag kuryente, kag ang mahimo sini nga epekto sa mga nagapuyo sa nagapalibot nga komunidad.
