ROXAS CITY – Importante ang kooperasyon sang mga pumuluyo sa pagpatuman sang curfew hours sa probinsya sang Capiz.
Ini ang ginpahayag ni Mr. Cocoy Vidal ang Provincial Coordinator for Health Care Professionals sang ma-interview sang Bombo Radyo Roxas.
Suno kay Vidal nga tanan nga mga pumuluyo sang probinsiya ang sakop sang curfew hours magluwas gid lamang sa mga law enforcers; persons on emergency health situations nga kinahanglan sang medical attention; government and private employees kalakip na ang mga health workers nga ang trabaho ang natuon sa curfew hours; mga naga-deliver sang goods kag services; kag mga nagatrabaho sa BPO’s sa baylo nga ma-comply nila ang mga rekisitos nga ginapangayo sang mga otoridad.
Magluwas diri, para naman sa mga nagasugat dul-ong sa mga empleyado nga natuon sa curfew hours kinahanglan lamang nila nga magpakita sang mga nagakaigo nga dokumento kapareho sang Identification Card (ID) ukon Scheduled time sang ila mga himata ukon abyan nga nagatrabaho sa night shift duty.
Dugang pa ni Vidal nga may iban naman nga mga empleyado nga nagapauli sa mga malayo nga lugar ang nagpangita naman sang ila boarding house ukon apartment nga malapit sa ila ginatrabahuan antes ginpatuman ang nasambit nga curfew.
Mahibaluan nga nagsugod na ang curfew hours alas-8:00 sang gab-i tubtob alas-5:00 buwas sang aga.
Ang nasambit nga curfew ang sandig sa implementing guidelines sang Memorandum Order No. 11, series of 2020 ni Capiz Governor Esteban Evan ‘Nonoy’ Contreras agud mapunggan nga makasulod sa probinsiya ang coronavirus disease (COVID-19).
