Ginbasura sang Korte Suprema ang petisyon sang manunudlo nga nagatinguha nga ideklarar nga “balido” ang quorum sang 12 ka senador sa tunga sang isyu sang pagbag-o sang liderato sang Senado.
Sa En Banc Session sang Korte Suprema subong nga adlaw, ginhimo ang aksyon sa petisyon nga gin-file ni John Barry Tayam.
Ginpaathag sang korte nga ang pagpahalin bangud sa kakulang sang legal nga tindog sang petitioner sa isyu.
Suno sa Korte Suprema, napaslawan si Tayam nga pamatud-an nga direkta siya nga apektado sang amo nga bagay.
Sa iya Petition for Certiorari, ginhingyo sang manunudlo nga masolbar ang kontrobersiya sa Senado angut sa boto kag ideklarar nga sufficient ang numero sang 12 ka mga senador para sa kinahanglanon nga quorum sa pagpatigayon sang session sa Hunyo 3.
Nagapati si Tayam nga importante nga mahatagan sang katin-awan angut diri agud nga padayon nga matuman sang Senado ang ila nga mandato sa paghimo sang kasuguan.
Apang bangud sa kakulang sang legal standing sang manunudlo sa amo nga bagay, ginbasura ang iya petisyon.
Ginpahayag ni Tayam nga tun-an niya ang mga masunod nga tikang nga mahimo himuon subay sa desisyon sang korte.
