Ginbasura sang Korte Suprema ang petisyon nga ginpasaka ni Atty. Herminio ‘Harry’ Roque batok sa House of Representatives Quad Committee.
Ang petisyon sang abogado nagatinguha nga punggan ang komite sa pagdakop sa iya kag pagpilit sa iya nga magtambong sa mga hearing kag magsumite sang mga dokumento sa imbestigasyon may kaangtanan sa Philippine Offshore Gaming Operators ukon POGO.
Sa desisyon nga ginsulat ni Associate Justice Samuel Gaerlan, ang Korte Suprema En Banc ginakabig ang ‘Petition for Certiorari and Prohibition’ nga ‘moot and academic’ pagkatapos nga gin-lift sang QuadComm ang iya ‘contempt order’ sa katapusan sang 19th Congress sang Hunyo, 2025.
Apang, gin-athag man ni Roque sa isa ka video post nga base sa konstitusyon, may yara sang exception sa mootness doctrine.
Matandaan, nga gin-imbita sang QuadComm si Atty. Roque agud magtambong sa una nga hearing bilang ‘resource person’ apang wala nagpakita bangud ginapatihan nga ginsaylo na ang schedule ukon petsa sini.
Samtang, nagtambong ini sa ikaduha nga hearing kag ginkwestyon ang iya kahilabtanan sa operasyon sang POGO, gani ginmanduan siya nga magtambong sa masunod nga hearing dala ang pila ka mga dokumento.
Wala naman nagtuman si Atty. Roque kag nag-file sang ‘motion to quash subpoena’ apang gin-deny’ lamang ini sang komitiba kag gin-isyuhan siya sang ‘show cause order’ para depensahan ang iya kaugalingon agud indi siya ma-contempt.
Makaligad sang pila ka tion, sa panibag-o nga resolusyon sang Korte Suprema, ginbasura sini ang iya nga petisyon.
