ROXAS CITY – Nagnubo sang 65.92% ang narekord nga krimen sa Western Visayas bangud sa ginapatuman nga community quarantine tuga sang coronavirus disease (COVID-19) pandemic.
Ini ang ginpahayag ni Police Regional Office 6 Acting Public Information Officer, Police Lt. Col. Gilbert Gorrero sang mainterview sang Bombo Radyo Roxas.
Mahibaluan nga gikan sa 628 sang nakaligad nga tuig, nagnubo sa 214 ang narekord nga mga kaso sa kapareho nga period sini nga tuig kadungan sang implementasyon sang community quarantine.
Nagnubo naman sang 414 ang narekord nga krimen humalin Marso 17 tubtob Mayo 10, sini nga tuig nga ginalakipan sang murder, homicide, physical injuries, rape, robbery, theft kag carnapping.
Ginalantaw nga dako nga bulig ang ginapatuman nga community quarantine, curfew, liquor ban kag border checkpoints sa pagnubo sang kaso sang krimen sa rehiyon.
