Gindala sa ospital si Queen of All Media Kris Aquino agud ipaidalom sa pila ka mga test matapos nga nakitaan sang “makaalarma” nga resulta ang iya blood panel.
Sa isa ka post sa Instagram sang Agosto 19, ginpaambit ni Kris nga yara siya sa ospital upod sa iya anak nga si Bimby agud magbaton sang iya ikaduha nga dosage sang bulong.
Suno kay Aquino, ang iya doctor ang nakatalupangod sang tumalagsahon nga resulta sang iya blood test rason nga gilayon ini nga ginpanugyanan nga magpaidalom sa ultrasound kag iban pa nga test.
Gin-athag sang tatlo ka mga espesyalista nga indi dapat pag-i-postpone ang mga ini bangud mahimo nga yara sa risgo ang iya kondisyon.
Matandaan nga may 11 ka autoimmune diseases si Kris kag sa subong naga-inom sang mabaskog nga bulong kaangay sang immunosuppressants, antihistamines, kag iban pa nga bitamina.
Ginpili sini nga magpabulong sa mga Filipino doctors sang sa mag-inom sang bulong nga indi niya sigurado, ilabi na nga allergic ini sa blood thinners.
Nagpangayo ini sang pangamuyo sa publiko para sa iya padayon nga pag-ayo kag nagpasalamat sa mga nagsuporta sa iya sa ila kaalwan.
Sa subong, nagapabilin ini sa compound sang iya pamilya sa Tarlac bilang kabahin sang iya anum ka bulan nga preventive isolation.
