Malipayon nga ginpaambit ni Krishnah Gravidez ang iya eksperyensya bilang Miss World Asia sa ika-72 nga edisyon sang Miss World pageant nga ginhiwat sa India.
Apisar nga wala niya ini ginalauman, nagpabutyag sang hugot nga pagpasalamat si Gravidez sa nasambit nga pasidungog.
Nahibaluan nga nagpakigbahin ini sa nagkalain-lain nga aktibidad sa India sa sulod sang masobra isa ka bulan, lakip na ang isa ka sports challenge kun sa diin nagtapos siya bilang runner-up sa badminton batuk sa Miss Canada.
Ginbalikan naman sang beauty queen ang iya mga inagihan sang ginbilin niya ang katunga sang iya bagahe bangud sa aksidente, apang ginbuligan siya sang Filipino community sa India pinaagi sa pagdonar sang mga bayo kag mga gamit.
Ginpaambit man niya nga madugay na siya nga nagahanda, ilabi na sa mga ikasarang sa komunikasyon, paghanas sa Q&A, kag proyekto sa adbokasiya. Suno sa iya, ang iya katuyuan amo ang mangin tampad kag makatawo sa tagsa ka sabat nga ihatag sa kompetisyon.
Magluwas sa titulo, nangin malapit man si Gravidez sa mga kaupdanan niya nga kandidato gikan sa Asya, lakip na si Miss Thailand Opal Suchata nga ginkoronahan bilang Miss World 2025.
Samtang, ginalauman nga magapasakop si Krishnah sa nagkalain-lain nga mga kahiwatan kag mga proyekto sa komunidad upod sa iban pa nga mga continental queens.
Natalana nga magbalik sa Pilipinas si Krishnah sa masunod nga mga inadlaw.
