Nagalala ang krisis sa suplay sang tubig kag kuryente sa Kuwait matapos ang sunod-sunod nga mga pag-atake sa mga pasilidad sang enerhiya, nga nagpalala pa gid sang tensyon sa Middle East.
Suno kay Bombo Joseph Rivera, International Correspondent sa Qatar, gin-atake sang Iran ang isa ka power kag water distillation plant nga nagresulta sa sunog kag pagkarumpag sang pila ka power generator units.
Ini na ang ikapulo na nga pag-atake sa sulod lamang sang kapin isa ka semana batok sa mga power kag water facilities sa Kuwait.
Pahayag pa niya, bangud sang nagalala nga sitwasyon, nagpanawagan ang gobyerno sang Kuwait sa mga residente nga magkinot sa paggamit sang kuryente agud malikawan ang dugang nga pressure sa power grid samtang ginatinguhaan sang mga otoridad nga mapabilin ang suplay sang kuryente.
Samtang naglala ang krisis, gin-ako sang Iran nga ila ang mga pag-atake nga nagatutok sa mga assets sang Estados Unidos sa Kuwait.
Padayon man nga ginabantayan sang mga otoridad sa Middle East ang sitwasyon bangud sa dala nga kahadlok nga dala sang pag-atake nga posible magtuga sang mas daku nga krisis sa enerhiya, tubig kag seguridad sa bug-os nga rehiyon.
