Gintudlo ang kakulang sang supply sang kuryente sa Visayas bilang isa sa mga rason sang pagtaas sang balayran sa kuryente sang mga konsumidor sa Visayas.
Sa pahayag ni Engr. Edgar Diaz, General Manager sang Capiz Electric Cooperative, iya ginpahayag nga kulang ang mga planta sang kuryente sa Visayas, rason kun ngaa nagataas ang presyo sang kuryente.
Suno kay Diaz, ang Luzon may peak demand nga 10,981 megawatts kag surplus generation nga 2,570 megawatts, samtang ang Visayas may actual supply nga 2,172 megawatts kag demand nga 2,598 megawatts.
Dugang pa niya, ang deficit sa supply sang kuryente amo ang rason kun ngaa nagapatuman sang red alert sa Visayas, bangod indi bastante ang available nga supply sa demand.
Pahayag pa ni Diaz, mas madamo ang mga planta sang kuryente sa Luzon kon ipaanngid sa Visayas, kinahanglan sang dugang nga power generation facilities agud masolusyonan ang energy problem nga ginatubang sang rehiyon.
