Ginhatagan sang importansya sang Provincial Tourism and Cultural Affairs Office ang pagpreserbar sang kultura kag kasaysayan sang Capiz kadungan sang pagsaulog sang National Heritage Month subong nga bulan.
Sa interview sang Bombo Radyo kay Alphonsus Tesoro,head sang Provincial Tourism and Cultural Affairs Office, iya ginpahayag nga daku ang importansya sang pagsaulog bangud nagahatag ini sang kahigayunan sa mga Capiznon nga mapabatyag ang paghigugma kag pag-appreciate sa lokal nga kultura, tradisyon kag mga pamana nga kasaysayan sang probinsya.
Suno kay Tesoro, padayon nga ginapanginbulahan sang ila talatapan ang pagpreserbar sang cultural heritage paagi sa pag-organisar sang mga cultural presentations, heritage exhibits, educational campaigns kag iban pa nga aktibidad nga nagapakita sang kultura sang Capiz.
Pahayag pa niya, isa man sa prayoridad amo ang pagpakilala sa kabataan nga mangin kabahin sang mga programa nga naga-promote sang lokal nga tradisyon agud mapadayon ini sang masunod nga henerasyon.
Sa pihak sini, ginpasalig sang Provincial Tourism and Cultural Affairs Office nga padayon nila nga suportahan ang mga inisyatibo para sa cultural preservation agud mapabilin nga buhi kag mapasa sa masunod nga henerasyon ang mayaman nga kultura kag heritage sang Capiz.
