Nagakadapat nga mapreserbar kag mapasa sa mga kabataan ang kultura kag mga tradisyon sang mga Capiznon agud indi ini madula sa masunod nga mga henerasyon.
Sa interview sang Bombo Radyo kay Christian George Acevedo, writer kag historian, iya ginpahayag nga ang mga tawo amo ang nagaserbe nga bearer sang kultura nga ila natun-an halin sa pamilya kag sa palibot nga ila ginatubuan.
Suno kay Acevedo, importante nga indi pagtugutan nga madula ang mga tradisyon kag kultura sang Capiznon, ilabi na ang mga istorya kag impormasyon nga makita kag mabasa sa mga libro.
Pahayag pa niya, indi dapat mangin balabag ang pagkamodernisado sang panahon sa pagpreserbar sang kultura, kundi mahimo pa ini gamiton bilang paagi agud mas mapalapnag kag mapakilala ang kultura sang Capiznon.
Dugang pa sang natungdan, importante ang pagpreserbar kag pagpasa sang kultura agud mapadayon ang mga istorya kag handumanan sang mga katigulangan kag mapasa ini sa masunod nga mga henerasyon.
