ROXAS CITY – Ginapatihan nga daku nga parte para magtaas ang numero sang mga tigulang nga nalatnan sang coronavirus disease 2019 ukon COVID-19 sa Espanya ang kultura sang pungsod.
Sa report ni Bombo International Correspondent Emily Lao, tumandok sang Iloilo kag nagatrabaho sa Vigo, Spain, ginpahayag sini nga kilala nga active sa ila nga night life ang kadam-an nga mga taga Espanya, sa diin bisan tigulang makita nga nagainum sa mga bar.
Isa ini sa ila kinaandan nga pagginawi rason nga naglapta ang virus sa iban nga mga tawo kag bangud tigulang na, mahina na ang ila nga immune system gani masami sila nga nagamasakit kag nagakalamatay.
Hugot man nga ginapatuman ang social distancing nga isa ka preventive measure nga ginapahanumdum sang gobyerno para makalikaw sa nasambit nga sakit.
Nagapabilin naman nga sarado ang mga stores sa Vigo, Spain kag padayon lamang ang operasyon sang mga supermarkets, pharmacies kag duha ka beses sa isa ka semana lamang kun magbukas ang mga bangko.
Limitado man ang biyahe sang bus kag duha ka train lamang sa isa ka adlaw ang operational.
Nagapanagtag man sang groceries ang gobyerno sa mga residente nga nadulaan sang trabaho bangud sa lockdown.
Samtang ginpalawig pa sang gobyerno sang 15 diyas ang lockdown sa pungsod para mapauntat ang pagtaas sang numero sang mga na-biktima sang COVID-19.
