ROXAS CITY – Kun magahalin ako sa pwesto, suportahan bala nila ang gobernador?
Ini ang makahas nga palamangkutanon nga ginbuy-an ni provincial administrator Dr. Edwin Chinel Monares kasunod sang gindihon nga open letter ni Board Member Weldie Apolinario nga naka-address kay Capiz governor Esteban Evan Nonoy Contreras nga nagapa-revoke ukon nagapa-recall sa iya appointment sa amo nga posisyon.
Sa exclusive interview sang Bombo Radyo, nagbuya sang pila ka mga palamangkutanon si Monares bilang sabat sa nasambit nga isyu.
Ginpahayag ni Monares nga pananglitan nga magbiya ini bilang administrador, mahimo ayhan nga mapapasar sang Sangguniang Panlalawigan ang Annual Investment Program (AIP) sang gobyerno-probinsiyal para sa tuig 2020?
Matandaan nga nangin kontrobersiyal ang AIP matapos nga wala ini gin-aprubahan sang SP kasunod sang ginapahayag nakita nila nga mga ‘discrepancy’ ukon iregularidad.
Magluwas diri gintuad man ni Monares nga kun magbiya siya sa pwesto, malikawan ayhan ang pila ka mga isyu nga ginpangatubang sang nagluntad ang bagyo nga Ursula kapareho sang pagkapatay sang pila ka mga pasyente sa Roxas Memorial Provincial Hospital?
Sa ulihi ginpamangkot man sang gobernador nga kun magbiya siya sa pwesto, pagasuportahan bala ayhan sang mga miyembro sang Sangguniang Panlalawigan ang tanan nga ordinansa nga luyag mapapasar ni governor Contreras?
