ROXAS CITY – Ginlamon sang kalayo ang porsyon nga kusina sang isa ka puluy-an sa Barangay Lawaan, Roxas City takna 8:30 sang aga kahapon Nobyembre 8, 2023.
Ang nasambit nga puluy-an ang ginapanag-iyahan ni Leobert Dela Cruz, 51-anyos kag residente sang amo nga lugar.
Sa impormasyon nga nakuha sang Bombo Radyo sa Bureau of Fire Protection (BFP) Roxas, ginapahayag nga nagaluto ang bata ni Dela Cruz sang ila sud-an apang ginsugo ini nga magbakal sa tindahan kag nagpadulong naman sa trabaho si Dela Cruz.
Apang wala magdugay natalupangdan na lamang sang mga kaiping sini nga nagadaba-daba na ang ila kusina kung sa diin madasig nga ginlamon sang kalayo ang dingding kag mga panapton nga malapit sa ginalutuan.
Ginalantaw nga rason sa amu nga sunog, bangud sa makusog nga huyop sang hangin.
Samtang, gilayon naman ini nga ginrespondehan sang mga pumuluyo sa lugar subong man sang katapo sang Bureau of Fire Protection (BFP) Roxas.
