ROXAS CITY – Ginpatpat sang Department of Social Welfare and Development-6 ang kaungdan sang RA 11861 ukon ang gin-amyendahan nga RA 8972 nga “Solo Parents’ Welfare Act of 2000”.
Sa interview sang Bombo Radyo kay Ms. Jewel Rose Galiga, Social Welfare Officer 3 sang DSWD-Region VI, ginpahayag sini nga madamo sang gindugang nga benepisyo kag kategorya sa nasambit nga layi.
Una diri, mahimo na nga maka-apply sang solo parent ID ang isa ka iloy ukon amay nga isahanon nga ginabuhi ang isa ukon mga kabataan naga-edad 22-anyos panubo.
Subong man, mahimo na maka-avail ang mga asawa ukon bana sang Overseas Filipino Worker (OFW) nga nabilin diri sa Pilipinas kag nag-isa na katuig sa iban nga pungsod, apang indi masarangan ukon sulod sa low income category sang DSWD.
Gindugang man diri sa kategorya ang mga lolo ukon lola nga isahanon nga ginabuhi ang iya apo, nga wala ginabuligan sang iban pa nila nga himata.
Suno kay Galiga, ini ang mga gindugang nga kwalipikasyon sa RA 8972, kun sa diin dugang lamang ini sa nauna na nga benepisyaryo sang layi kaangay sang biktima sang pagpanghimulos; may asawa ukon bana nga preso; nagabusong nga ginbayaan sang ila bana kag iban pa nga solo nga nagabuhi sang bata
Pila sa mga benepisyo amu ang 7 days leave sa mga empleyado nga benepisyaryo; 1K per month subsidy; scholarship program pinaagi sa TESDA, DepEd ukon CHED; kag 10% discount sa pagbakal sang gatas, diaper supplements ukon bulong sang may mga bata naga-edad 6-katuig panubo.
Ginklaro diri nga indi na mahimo maka-avail ang 4P’s beneficiary, kag sulod sa programa ang senior citizens kag PWD.
Isa sa kwalipikasyon sa luyag mag-avail sa programa, amu nga indi magsobra sa P250K ang tuigan nga kita sini.
Matandaan nga ginpirmahan ni DSWD Sec. Erwin Tulfo ang Implementing Rules and Regulations (IRR) sang RA 11861, sang Setyembre sini nga tuig kag natalana nga igapatuman antes magtakop ang tuig 2022.
Sa dugang nga impormasyon kag sa pag-apply sa sini nga programa sang ahensya, mahimo lamang nga magpadulong sa Municipal ukon City Social Welfare and Development Office sa inyo LGU, para sa kinahanglanon nga rekisitos.
