Naglapaw na sa spilling level ang tubig sa La Mesa Dam subong nga Lunes sang gab-i, matapos ang sunod-sunod nga pag-ulan tuga sang Habagat.
Narekord ang 80.27 meters nga lebel sang tubig sang dam pasado las 9 sang gab-i.
Labaw pa ini sa normal nga lebel sang pag-ula sang dam nga 80.15 metros.
Suno sa PAGASA, mahimo nga mag-awas ang sobra nga tubig baha kon maglab-ot na sa 80.15 meters ang lebel sang tubig sa La Mesa Dam.
Mahimo nga maapektuhan sang pagbaha ang mga manubo nga lugar malapit sa Tullahan River, lakip na ang mga bahin sang Quezon City, Caloocan City, Valenzuela City, Malabon City kag Navotas City.
Sa Quezon City, lakip sa mga lugar nga posible maapektuhan sang baha kon mag-awas ang dam amo ang Fairview, Forest Hills Subdivision, Quirino Highway, Sta. Quiteria kag San Bartolome.
Samtang yara sa Valenzuela City, mahimo maapektuhan ang mga lugar malapit sa North Expressway kag La Huerta Subdivision.
Bangud sini, nagapanugyan ang PAGASA sa mga pumuluyo nga nagapuyo sa nasambit nga mga lugar, ilabi na ang mga malapit sa suba, nga mangin alerto sa posibilidad sang hinali nga pagbaha ukon flash floods.
