ROXAS CITY – Nangin madinalag-on ang ginpatigayon nga Motorcycle Day, nga ginpatigayon sa probinsya sang Capiz.
Sa interview sang Bombo Radyo kay Pastor Russell Monton Ban Organizer sang Motorcycle Day, ginpahayag sini nga nag-awas ang kasadya sa iya dughan bangud natigayon ang amu nga programa sa probinsya.
Suno kay Ban, masobra 1,200 nga mga motorista ang nakigbahin sa programa nga kun sa diin nagikan sa nagkalain-lain nga mga grupo sang nagkalain-lain man nga mga kabanwahanan.
Mahibaluan nga ang Motorcycle Day ang natalana kun tani nga pagahiwaton sadtong Mayo 28 apang ginpakamaayo nga patigayunon lamang ini sang Hunyo 11 bangud sa ginakabalak-an nga posible pagtupa sang Bagyong Betty sa probinsya.
Bangud sini, madamo suno kay Ban ang ila nga ginbag-o sa ila programa bangud halos nakaplastar na ang tanan apang bangud sa wala ginalauman nga hitabo, nagdoble ang ila gastos agud matigayon lamang ini.
Nagsugod ang amu nga aktibidad alas 6:00 sang aga kag natapos takna alas 11:00 sang gab-i nga ginhiwat sa nagkalain-lain nga venue sa diin nakahatag sang kalipay sa mga motorista.
Dugang pa ni Ban nga nagapangaduha ang probinsya sang Capiz nga may pinakamadamo nga motorsiklo kag handum sini nila nga magapanguna ini kun padayon nga patigayunon ang amu nga programa kada tuig.
Samtang, una pa lamang ini suno diri nga kahigayunan kag diri nila nakit-an kun anu ang mga kulang kag kinahanglan nga pun-an sa masunod nga pagselebrar sang amu nga programa.
