ROXAS CITY – Padayon ang pagpatigayon sang retrieval operation sang katapo sang Mambusao Municipal Police Station kaupod ang mga opisyales sang barangay kag Mambusao Emergency Response Unit sa isa ka lalaki, matapos ginapahayag nga nalumos sa suba sang Liboo-Batiano takna alas 11:00 kaina sang aga Nobyembre 23, 2023 sa banwa sang Mambusao.
Sa interview sang Bombo Radyo kay PCPT. Alladen Talaban OIC sang Mambusao Municipal Police Station ginkilala ang biktima kay alyas “Toto” 21-anyos kag residente sang Barangay Batiano sa amu nga banwa.
Suno kay Talaban nga nagatabok sa suba ang biktima pinaagi lamang sa paglangoy kaupod ang apat sini nga mga pakaisa sang hinali na lamang ini nga naglugdang.
Mahibaluan nga gintestingan pa nga salbaron sang iya mga kaupdanan ang biktima, apang bangud sa mabaskog nga current sang tubig wala na nila ini nakit-an pa.
Sa karun, wala nagauntat sa pagpangita ang mga otoridad sa nasambit nga biktima.
Panawagan ni Talaban kung sin-o man ang makakita sa lawas ni alyas “Toto” gilayon nga magpakig-angut sa ila subong man sa pamilya sini.
