ROXAS CITY – Arestado ang lalaki ginapahayag may kaso nga rape sa Barangay Calapawan, Panay, Capiz takna alas 2:26 sang hapon kahapon Hulyo 19.
Ginkilala ang nadakpan kay Renato Belo alyas ‘Nene’ 48-anyos laborer kag residente sang Barangay Poblacion Ilawod, Panay, Capiz.
Sa impormasyon nga nakuha sang Bombo Radyo sa Panay Municipal Police Station, natigayon nga madakpan si Belo pinaagi sa gintingub nga pwersa sang Provincial Intelligence Unit (PIU), Capiz Tracker Team, Panay MPS, Capiz Maritime Police Station kag Malolos City Police Station.
Ang warrant of arrest ang gin-isyu kag ginpirmahan ni Hon. Victoria C. Fernandez-Bernardo, Presiding Judge,RTC 6, Branch 18, Malolos City, Bulacan napetsahan Disyembre 13 ,2019.
Wala sang piyansa nga ginpapanaog ang korte, para sa temporaryo nga kahilwayan ni Belo.
Sa karun yara na ini sa kustodiya sang Panay MPS para sa nagakaigo nga disposisyon.
