Laborer pilason, matapos ginbuno sang kaangay man nga laborar sa banwa sang Tapaz

ROXAS CITY – Pilason ang laborer matapos nga ginbuno sang kaangay man sini nga laborer sa Barangay Bag-ong Barrio, Tapaz, Capiz.

Ginkilala ang biktima nga si Makmak, 30-anyos, kag residente sang Barangay Cansalongon Isabela Negros, Occidental samtang ang ginapahayag nga suspek ang nagapang-edaron sang 22-anyos kag residente sang Barangay Manaripay, Lambunao, Iloilo kag lunsay temporaryo nga nagapuyo sa nasambit nga barangay.

Sa impormasyon nga nakuha sang Bombo Radyo nagikan sa Tapaz Municipal Police Station, ginapahayag nga samtang nagalantaw ang biktima sa iya sini nga cellphone hinali na lamang ini nga ginkompronta sang suspek kag ginbuno.

Bangud sini, nag-angkon sang pilas sa wala nga tyan ang biktima nga madasig naman ginpadangat sang iya mga himata sa Tapaz District Hospital para sa nagakaigo nga pagbulong apang gin-referred ini sa Roxas Memorial Provincial Hospital.

Mahibaluan nga lunsay nakainum sang makahulubog nga ilimnon ang biktima kag suspek kag ginapahayag nga indi pag-intindihanay ang motibo sa nasambit nga pagpangbuno.

Sa karun padayon nga nagapatigayon sang hot pursuit operation ang katapo sang Tapaz MPS batuk sa suspek matapos nga makapalagyo matapos makumiter ang nasambit nga krimen.