MANILA — Indi na pagapakitaon sang House prosecution panel bilang mga testigo sa impeachment trial ni Vice President Sara Duterte sanday Col. Raymund Lachica, Col. Dennis Nolasco kag Ramil Madriaga nga may kaangtanan sa alegasyon sang pag-abuso sa confidential funds.
Suno kay prosecution panel adviser kag spokesperson Robert Ace Barbers, indi na kinahanglan pa nga ipatawag ang tatlo bangud suno sa iya, napamatud-an na sang mga nauna nga testigo ang mga alegasyon nga ginapahayag sa impeachment article nahanungod sa umano nga misuse sang confidential funds.
Suno pa kay Barbers, mahimo pa nga maabot sang prosecution ang ila target nga matapos ang presentasyon sang mga ebidensya sa Setyembre 9.
Sanday Lachica kag Nolasco amo ang anay nagserbisyo bilang chief kag deputy chief sang Vice Presidential Security and Protection Group ukon VPSPG. Ginakabit ang ila mga pangalan sa pag-disburse sang confidential funds sang Office of the Vice President kag Department of Education sang panahon nga ginapangulohan ini ni Duterte.
Samtang, si Madriaga amo ang nag-angkon nga ang confidential funds ginahatag kuno bilang cash sa nagkalain-lain nga persona suno sa mando sang Vice President. Apang ginpanginwala ini ni Duterte kag nagpasaka pa sang perjury complaints batok kay Madriaga.
Sa pihak nga bahin, ginpanawagan ni Manila 6th District Representative Bienvenido Abante Jr. nga sa baylo nga ang mga staff ukon anay security officials ni Duterte ang ipatawag, mas maayo kun mismo ang Vice President ang mag-atubang kag magsabat sa mga alegasyon batok sa iya.
Suno kay Abante, si Duterte mismo ang may pinakadirekta nga ikasabat sa mga alegasyon nga yara sa impeachment articles. Apang siling ni Barbers, ginatalakay pa lamang sang prosecution ang posibilidad nga ipatawag ang Vice President, bangud yara man siya sa pagrepresentar sang iya 16 ka abogado.
Samtang, gin-uyonan man nanday Abante kag Barbers ang panawagan sang pila ka senador-judges nga repasuhon ang voting threshold para sa conviction. Ginakwestyon ini bangud sa 16 ka senador nga nagaserbisyo bilang impeachment judges, duha ang detained kag isa ang wala pa makita, gani suno kay Barbers, mahimo nga indi patas ang paggamit sang 16-vote requirement sa conviction.
