Bukas si Senate President Pro Tempore Panfilo Lacson sa posibilidad sang dayalogo sa tunga sang Senado kag sang Embassy of China in Manila may kaangtanan sang nag-init nga isyu sa West Philippine Sea.
Ini ang matapos ginpahayag ni Chinese Ambassador Jing Quan ang kahandaan nga makigsinapol sa mga lider sang Pilipinas agud mapahagan-hagan ang pagbayluhanay sang mainit nga pahayag sa tunga sang mga opisyal sang duha ka mga pungsod.
Suno kay Lacson, “pleasantly surprised” siya sa nangin pahayag sang embahador kag luyag niya nga isuhestyon kay Senate President Vicente Sotto III nga imbitaran ang mga Chinese diplomat para sa isa ka pormal nga pagsinapol. Suno sa iya, mahimo nga magtambong ang mga miyembro sang mayorya kag magpadala man sang tiglawas ang minorya.
Ginsuhestyon man ni Lacson nga makigbahin sa dayalogo sanday Senador Francis Pangilinan, author sang resolusyon nga nagakondena sa pahayag sang embahada; Senador Risa Hontiveros; kag Senate foreign relations committee chair Erwin Tulfo.
Pahayag ni Lacson, mas maayo ang nagaatubangay nga pag-istoryahanay sa pihak nga magsinabtanay sa plenaryo sang Senado. Dugang pa niya, dapat probetsaran ang amo nga “good opening” bangud nagapabilin ang relasyon diplomatiko sang Pilipinas kag China, kalakip ang pagpatuman sang One China Policy.
Una na diri, gin-aprubahan sang Senado ang isa ka resolusyon nga nagakondena sa mga nangin pahayag sang Chinese Embassy batuk sa pila ka mga opisyal sang Pilipinas nga nagpahayag sang panindugan sa kinamatarong sang pungsod sa West Philippine Sea.
