Patay ang lady pilot ni Willie Revillame matapos nga nag-crash ang helicopter nga iya ginpalupad kahapon sa Guimba, Nueva Ecija.
Suno sa report ni LtCol George Calauad Jr., Guimba Chief of Police, narekober gikan sa crash site ang bangkay sang biktima nga si Julia Flori Monzon Po, 25-anyos, residente sang Marina Bay Homes, Asia World, Parañaque City.
Base sa imbestigasyon, natabo ang insidente alas 5:00 sang hapon sa Sityo Arimung-mong, Barangay San Miguel, Guimba, Nueva Ecija.
Si Po ang madugay na nga piloto sang TV host nga si Wilie Revillame.
Ginapahayag nga ginpalupad ni Po ang Robinson helicopter nga may body number RP-C3424 gikan sa Baguio kag padulong sa Maynila sang magluntad ang pagsigabong.
Antes naghalin sa Baguio nag-landing ini sa Binalonan, Pangasinan para mag-refuel sang alas 12:05 sang udto.
Apang wala suno diri gilayon mag-start ang helicopter antes ini dalayon nga nakalupad alas 4:25 sang hapon.
Nakabaton naman ang Guimba Police Station sang report nagikan sa isa ka concerned citizen alas 5:20 sang hapon nahanungod sa isa ka helicopter nga nagtibusok sa Barangay San Miguel.
Madasig nga nagpatigayon sang salvage operation agud mabutong ang helicopter gikan sa creek nga asta sa dughan ang kadalumon.
Gilayon naman nga ginpadulungan sang TV host ang bangkay ni Po sa HM Mina Funeral Services sa Pacac, Guimba.
Ginalauman nga igasaylo ang bangkay sang piloto sa Heritage Park sa Parañaque.
Nagapadayon ang imbestigasyon sang pulisya kun ano ang rason sang pagtibusok sang chopper.
