ROXAS CITY – Desidido nga magpasaka sang panumbungon ang lady rider kag vlogger kontra sa suspek nga ginapatihan naghimulos sa iya sa banwa sang Pontevedra, Capiz.
Ang wala na ginhingadlan nga biktima ang indi tumandok sang probinsya.
Base sa nakuha nga impormasyon sang Bombo Radyo Roxas, natigayon na nga mapaidalum sa medical examination ang biktima sa Roxas Memorial Provincial Hospital (RMPH).
Matapos sini, gilayon na nga nagpadulong ang biktima sa Provincial Prosecutors Office sa Hall of Justice (HOJ) agud mag-file sang nagakaigo nga panumbungon kontra sa suspek nga ginapatihan anak sang kilala nga pulitiko sa nasambit nga banwa.
Matandaan nga natabo ang ginaalegar pagpanghimulos sa biktima kagab-i, Nobyembre 25 sini nga tuig.
Ginaalegar nga gin-imbitar ang biktima nga magpadulong sa barracks sang suspek kag diri ang natabo nga pagpanghimulos.
Maswerte lamang nga nakapalagyo ang biktima bangud kun wala, posible suno diri nga ginbulos-bulusan ini sang mga kaupdanan sang suspek nga ginapatihan nagapatigayon sang pot session.
Matapos mahibaluan sang mga abyan sang biktima ang natabo, gilayon ang mga ini nga nagpadulong sa Roxas Component City Police Station apang bangud guwa sa jurisdiction sang syudad ang lugar nga gintabuan, ginbalik ang imbestigasyon sa Pontevedra Municipal Police Station.
Mahibaluan nga nagpadulong ang biktima sa nasambitan nga banwa matapos mapilian bilang bisita sang patigayunon nga motorshow.
