IVISAN CAPIZ – Arestado ang isa ka lalaki, matapos ang ginpatigayon nga search warrant operation sang mga katapo sang Ivisan Municipal Police Station, sa Sitio Almon Brgy. Malocloc Sur, Ivisan, Capiz.
Ginkilala ang arestado kay alyas “Julius”, 32-anyos, kag residente sang nasambit nga lugar.
Sa interview sang Bombo Radyo sa hepe sang Ivisan MPS nga si PMAJ Ruby Magallanes, ginpahayag sini nga nakuha sa paghinakop sang nadakpan ang duha ka .38 caliber revolver, isa ka black holster, kag tatlo ka live ammunition.
Ang search warrant ang gin-isyu kag ginpirmahan Hon. Lorencito B Diaz, Acting Executive Judge, RTC 6th Judicial Region, Roxas City, Capiz.
Magapangatubang sa kaso nga RA 10591 ukon Comprehensive Firearms and Ammunition Regulation Act ang nasambit nga persona.
Sa karon, yara na ini sa paghinakop sang Ivisan MPS para sa nagakaigo nga disposisyon.
