ROXAS CITY – Arestado ang 43-anyos nga lalaki matapos nga nabaklan sang armas luthang sa ginkasa nga buybust operation sang mga kapulisan Barangay Culilang, President Roxas, Capiz.
Ginkiala ang arestado nga si alyas ‘Roderick’, residente sang Barangay Poblacion Elizalde, sang nasambit nga banwa.
Sa interview sang Bombo Radyo kay Police Major Rachelle Garnica, hepe sang President Roxas Police Station, suno diri natigayon nga madakpan si ‘Roderick’ matapos mabaklan sang 1 ka unit sang caliber .38 revolver sa baylo sang P3,500 nga buybust money.
Magluwas sa armas luthang, narekober man sang kapulisan pinaagi sa pagrekisa ang 2 ka sachet sang ginapatihan iligal nga droga ginabulubanta may kabug-aton nga 5 ka gramos.
Magapangatubang ang arestado sa kaso nga paglapas sa Republic Act 10591 ukon Comprehensive Firearms and Ammunition Regulations Act kag Republic Act 9165 ukon Comprehensive Dangerous Drugs Act of 2002.
Sa karon, nagapabilin si ‘Roderick’ sa kustodiya sang President Roxas PNP para sa nagakaigo nga disposisyon.
