Arestado ang isa ka lalaki matapos makuhaan sang armas-luthang kag ginapahayag nga illegal nga droga sa Barangay Poblacion Ilaya, Dao, Capiz.
Ang arestado amo si alyas “Nelmar,” residente sang amo nga lugar.
Sa interview sang Bombo Radyo kay Police Captain Rey Contreras Dordas, hepe sang Dao Municipal Police Station, iya ginpahayag nga nadakpan ang subject person sa akto nga nagabitbit sang 12-gauge shotgun, nga sahi sang armas-luthang.
Suno kay Dordas, sang ginkirisa ini nakuha man sa paghinakop sang arestado ang ginapahayag illegal nga droga.
Kaso nga paglapas sa Republic Act 10591 ukon “Comprehensive Firearms and Ammunition Regulation Act ang pagatubangon sang arestado.
Sa subong, yara na ang arestado sa kustodiya sang Dao Municipal Police Station para sa nagakaigo nga disposisyon.
