PILAR, CAPIZ – Arestado ang isa ka lalaki matapos mabaklan sang indi lisensyado nga armas-luthang kag nakuhaan sang iligal nga droga sa ginpatigayon nga buybust operation sang kapulisan sa Barangay San Esteban, Pilar, Capiz.
Ginkilala ang arestado kay alyas Bong, 38-anyos nga residente sang nasambit nga Barangay.
Nakuha sa paghinakop sini ang isa (1) ka unit sang homemade pistolized break type 5.56mm nga may duwa ka live ammunition.
Dugang pa nga nakuha sa suspek ang duwa (2) ka sachet sang suspected shabu nga may kabug-aton nga 10 gramos kag may standard drug price nga P68,000 kag buybust money nga ginakabug-usan P1,600.00 sa nagkalain-lain nga denominasyon.
Magapangatubang ang suspek sang kaso nga paglapas sa Republic Act 10591 ukon Comprehensive Law on Firearms and Ammunitions Regulation Act kag Republic Act 9165 ukon Comprehensive Dangerous Drugs Act of 2002.
Sa karon, yara na sa kustodiya sang Pilar PNP ang suspek para sa nagakaigo nga disposisyon.
