ROXAS CITY – Dakop ang isa ka lalaki matapos ginapahayag nagmaoy kag nagpinalupok sang armas-luthang sa Barangay San Esteban, Pilar, Capiz.
Ginkilala ang nadakpan nga si alyas Karias kag residente sang Barangay San Ramon sang nasambit nga banwa.
Sa interview sang Bombo Radyo kay PSMS Elmer Balgos Jr. imbestigador sang Pilar MPS, nakabaton sila sang report angut sa ginapahayag nga pagpinalupok sang armas luthang kag pagtuga sang gamo sang suspek sa lugar.
Bangud sini, gilayon nila nga ginpadulungan ang amu nga lugar kag didto nadakpan sa akto ang suspek nga nagapalupok sang caliber 38 nga armas luthang.
Suno kay Balgos, dugang nga narekober sa posesyon sang suspek ang sling bag nga naga-unod sang granada, mga bala kag 1 ka sachet sang ginapatihan shabu.
Sa karun nakahunong na sa karsel sang Pilar PNP si alyas Karias para sa nagakaigo nga disposisyon.
